December 15, 2021

‘Yan bindiga sun yi garkuwa da mutane 5 a sabuwar harin da suka kai Zariya

Daga Danjuma Makery



A wata sabuwar hari da yan bindiga suka kai garin Dallatu da kuma Kasuwar Da’a da ke yankin Dutsen Abba na karamar hukumar Zariya a jihar Kaduna sun yi garkuwa da mutane 5 a yayin harin.

Wannan sabuwar harin da suka kai ta biyo bayan share awanni 24 kenan da harin da suka kai babban hanyar Kaduna-Zaria, inda suka kashe a kalla mutane 3, kana kuma suka yi awun gaba da wasu da dama.

Hukumar ‘yan sanda ta jihar Kaduna bata fitar da rahoto kan faruwar lamarin ba, sai dai kuma a bangare guda mazauna yankunan sun bayyana cewa yan bindigan sun kai harin ne a kauyen Dallatu da misalin karfe 1 na asubahin Laraba, kuma suka yi awun gaba da mutane 2.

Daga nan kuma suka kutsa kai zuwa kauyen Kasuwar Da’a inda suka yi awun gaba da mutane 6, wanda kuma 3 daga cikin su kananan yara ne.

Sai dai kuma wata majiya ta shaida cewa yaran 3 an sake su da safiyar yau Laraba, inda sauran mutane 5 din suka cigaba da kasancewa a sansanin ‘yan bindigan.

 

SHARE:
Rahotanni 0 Replies to “‘Yan bindiga sun yi garkuwa da mutane 5 a sabuwar harin da suka kai Zariya”